ಉತ್ತರದ ಪ್ರಾಕೃತ ಭಾಷೆಲು
1.70 ದ್ರಾವಿಡ ವ್ಯಾಕರಣದ ನಿಯಮ ತೂಯಿನಂಚನೇ ದ್ರಾವಿಡ ಭಾಷೆ ಇನ್ನಗ ಎವ್ವು, ಅಯಿತ ನಿಷ್ಪತ್ತಿ ಎಂಚ ತೆರಿಯೊನೊಡು. ಡಾ। ಕಾಲ್ಡ್‌ವೆಲ್ಲ ದ್ರಾವಿಡ ಪದತ ಮಿತ್ತ್ ದೀರ್ಘ ವಿವರಣೆ ಕೊರ್ತೆರ್. ದ್ರಾವಿಡ ಪದ ಆರೆನ ಪ್ರಕಾರ ಉತ್ತರದ ಸಂಸ್ಕೃತ ಅಥವಾ ಸಂಸ್ಕೃತಜನ್ಯ ಪಾತೆರೊದಕುಳು ದಕ್ಷಿಣದ ಭಾಷೆಲೆಗ್ ದೀತಿನ ಪುದರಾಂಡಲಾ, ವ್ಯುತ್ಪತ್ತಿದ ಪ್ರಕಾರ ದ್ರಾವಿಡ> ದ್ರಾವಿಳ>ದ್ರಮಿಳ>ತಮಿರ್>ತಮಿಳ್ ಇನ್ಪಿನವೇ ಪಣ್ತೆರ್. ಭಾಷಾಶಾಸ್ತ್ರದ ಪ್ರಕಾರ ದ್ರಾವಿಡ ಇನ್ಪಿ ಮೂಲಭಾಷೆ (proto-Dravidian) ತಮಿಳ್ ಅತ್ತಾವಂದೆ, ಸಮೀಪವರ್ತಿಯಾದಿತ್ತಿನ ತಮಿಳು, ಕನ್ನಡ, ತೆಲುಗು, ಮಲೆಯಾಳಂ ಸೇರ್ದಿನ ದಕ್ಷಿಣದಕುಳು ಪಾತೆರೊಂದಿತ್ತಿನ ಭಾಷೆ. ಗ್ರಂಥಸ್ತವಾವನಗ ಬೇತೆ ಬೇತೆ ಪುದರ್‌ಡ್ ಅಯಿಕುಳು ಬಲತ್ತೊಂದು ಬತ್ತಾ. ಉತ್ತರೊಡು ಕುರುಖ್, ಗೊಂಡಿ, ಮಾಲ್ಲೊ, ಬಲೂಟಿ ಇನ್ಪಿ ಭಾಷೆಲು ಕೂಡಾ ದ್ರಾವಿಡ ಭಾಷೆಗ್ ಕೈತಲಾದುಪ್ಪುನ ತೆರಿಯಂಡು. ಉತ್ತರದ ಗ್ರಂಥಭಾಷೆ ಸಾಹಿತ್ಯಭಾಷೆಲೆಡ್ ಸಂಸ್ಕೃತನೇ ಮುಖ್ಯ.
ಸಂಸ್ಕೃತ ಇನ್ಪಿ ಪದತ ಅರ್ಥ ಪರಿಷ್ಕಾರವದಿತ್ತಿನ ಭಾಷೆ ಇಂದ್‌ ತೆರಿಯೊಂಬಿನವಾಂಡ, ಅಯಿಕೊಂಜಿ ಮೂಲ ಭಾಷೆ ಇತ್ತುದುಪ್ಪೊಡು. ಕವಿರಾಜಮಾರ್ಗಕಾರೆ ಸಕ್ಕದ-ಪಾಗದ ಇನ್ಪಿ ರಡ್ಡ್ ಭಾಷೆನ್ ವಿಷಯನೇ ಪಣೊಂದು ಪೋಯೆ. ಸಕ್ಕದ ಇನ್ಪಿನವು ಸಂಸ್ಕೃತದ ತದ್ಭವವಾಂಡ, ಪಾಗದ ಇನ್ಪಿ ಪದ ಪ್ರಾಕೃತದ ತದ್ದವ. ತುಳುಟು ಪುರಾತನದವು ಇನ್ಪಿನಯಿಕ್ ಪ್ರಾಕದವು ಇನ್ಪಿ ಪದಪ್ರಯೋಗವುಂಡು. ಇಂದೆಟ್ ತೆರಿಪಿನ ವಿಷಯ ಈ ತುಳುವ ಕನ್ನಡ ಜಾಗೆಲು ಪ್ರಾಕೃತ (ಪಿರಾಕ್‌ದ) ಭಾಷೆಗೂ ಅನುವರ್ತಿಯಾದ್ ಇತ್ತಿನ ವಿಷಯದ ಸಂದೇಹ ತೋಜುನ ಸಾಧ್ಯ. ಆಂಡ, ಈ ನಮ ಭಾರತೊಡು ಸಂಸ್ಕೃತದ ದುಂಬುಡು ಎವ್ವೊ ಒಂಜಿ ಪಾತೆರೊ ಪ್ರಚಾರೊಡು ಇತ್ತ್‌ದ್ ಅಯಿಕ್ ಪಿದಯಿದ ಪಾತೆರೊಂಜಿ ಸಂಪರ್ಕವಾದ್, ಸಂಸ್ಕೃತ ಸುಸಜ್ಜಿತ ಭಾಷೆ ಆಯಿನವು ತೀರಾ ಸಂಭವನೀಯ. ದಾಯೆಗಿನ್ನಗ ಮೊಹೆಂಜೊದಾರೊ, ಹರಪ್ಪ ನಾಗರೀಕತೆಲು ವೇದಕಾಲೊಡ್ ಪಿರಾಕ್‌ದವು ಇಂದ್ದ್ ಇತ್ತೆದ ಚರಿತ್ರೆಕಾರೆರೆನ ಅಭಿಪ್ರಾಯವಾದ್ ಈ ನಾಗರೀಕತೆಲೆಡ್ ಪ್ರಾಕ್‌ದ ಲಿಪಿಲು ಉಪಯೋಗವಾದಿತ್ತಿನ ವಿಷಯದ ಮಿತ್ತ್ ಈ ಸಂಸ್ಕೃತಿನ್ ದ್ರಾವಿಡ ರೂಪದವು ಇಂದ್ದ್ ಕೆಲವು ವಿದ್ವಾಂಸೆರ್ ಪಣ‍್ತಿನವುಂಡು. ಲಿಪಿ ಅಧ್ಯಯನ ಮಳ್ಪುನಗ ಈ ಭಾಷೆಲು ಸಂಸ್ಕೃತದಂಚ ಸಂಧಿರೂಪದವು ಇಂದ್ದ್ಲಾ ತೆರಿದುಂಡು. ಕೆಲವು ವಿದ್ವಾಂಸೆರ್ ಈ ರಡ್ಜ್ ಮೂಲ ಭಾಷೆಲು ಕನ್ನಡ ಭಾಷೆಗ್ ತೀರಾ ಕೈತಲ್ದವು, ಕನ್ನೀರ್ ಪದ ಅಡಕುಳಿಡ್ ಇತ್ತ್‌ದ ಕನ್ನಡದ ಉಚ್ಚಾರವಿತ್ತಿನ ಕನ್ನಡ ಜನಮಾನಿಲೆನ ಸಂಸ್ಕೃತಿ ಇಂದ್ದ್ಲಾ
