(೩) ನಿಷೇಧಾರ್ಥಕ ಕ್ರಿಯಾಪದರೂಪಲು ಉಳ್ಳ, ಉದಾ: ಇಜ್ಜಿ, ಇಜ್ಜಾಂತಿನ, ಆವಂದಿನ ಇತ್ಯಾದಿ ಕ್ರಿಯಾಪದ ನಿಷೇಧ ರೂಪಲು. ಪೊರ್ಲುದಾಂತಿನ, ಗುಣದಾಂತಿನವು (destitute of good conduct or manners) ಇತ್ಯಾದಿ ಗುಣವಾಚಕ ನಿಷೇಧರೂಪಲು.
(೪) ಸಂಬಂಧಸೂಚಕ ಪದಲೆಡ್ ಹಿರಿಯೆರೆಗ್ ಅನ್ವಯವಾಪಿನವು, ಕಿರಿಯೆರೆಗ್ ಪಣ್ಪಿನ ಪದಲು ಬೇತೆ ಬೇತೆನೇ ಉಳ್ಳ. ಉದಾ: ತುಳುಟು ಅಣ್ಣೆ, ಪಲಯೆ, ಅಕ್ಕೆ, ಪಲಿ, ತನ್ನದ್ ಹಿರಿಯೆರೆನ್ ಸೂಚನೆ ಮಳ್ತ್ಂಡ, ಮೆಗ್ಗೆ, ಮೆಗುದಿ ಪದಲು ಎಳ್ಯಕುಳೆನ್ ಸೂಚನೆ ಮಳ್ಪುವಾ. ಇಂದೆಕುಳು ಅತ್ತಾವಂದೆ, ಅಭಿವ್ಯಾಪಕವಾದ್‌ ತಗೆ-ತಂಗಡಿ ಇನ್ಪಿ ಪದಲು ಉಳ್ಳ.
(೫) ದ್ರಾವಿಡ ಭಾಷೆಲೆಡ್ ಟಕಾರ, ಡಕಾರ ದಿಂಜ. ತುಳುಟು ಟಕಾರ ಡಕಾರವಾಪುಂಡು. ಕನ್ನಡದ ಉಂಟು ತುಳುಟು ಉಂಡು. ತಮಿಳ್ದ ತೊಟ್ಟ>ದೊಡ್ಡಿ (ಕನ್ನಡ,ತುಳು). ತಮಿಳ್ದ ಆಟ್>ಏಡ್(ತುಳು), ಆಡು(ಕನ್ನಡ). ತಮಿಳ ಕುರುಟ>ಕುರುಡು (ಕನ್ನಡ,ತುಳು).
(೬) ದ್ರಾವಿಡದ ಅವಧರಣಿ (accent) ಪದತ ಸುರುತ ಧ್ವನಿಮೆದ ಮಿತ್ತ್ ಬೂರುಂಡು. ಉದಾ: ತುಳುಟ್ ಬರ್ಸ(ವರ್ಷ) ಉಚ್ಚಾರೊಡು ಬ್ಬರ್ಸ ಆಂಡ್. ಹಿಂದಿಡ್ ಬರಸ್ ಆಪಿನಯಿಟ್ ಉಚ್ಚಾರ ಆರಂಭವಾಪಿನವೇ ದ್ವಿತ್ವದ ಲೆಕ್ಕೊ ಕೇಣುಂಡು.
(೭) ಕ್ರಿಯಾಧಾತುಲೆನ ಮೂಲರೂಪೊಗು ಲಾ ಪ್ರತ್ಯಯ ಪತ್ತದ್ ಕ್ರಿಯಾರ್ಥ ವಿಧಿರೂಪ ಆದ್, ಕನಿಷ್ಟ ರೂಪದ ಕ್ರಿಯಾಪದವಾಪುಂಡು. ಉದಾ: ಬರ್ ಧಾತುಗ್ ಲಾ ಸೇರ್ದ್ ಬಲ್ಲಾ (ಇನ್ನಗ ಈ ಬಲ್ಲಾ ಇನ್ಪಿ ವಿಧಿರೂಪ) ಪೋ ಧಾತುಗ್‌ಲಾ ಸೇರ್ದ್ ಪೋಲಾ (ಇನ್ನಗ ಈ ಪೋಲಾ ಇನ್ಪಿ ವಿಧಿ ರೂಪ) ಇತ್ಯಾದಿ ಕನಿಷ್ಟ ರೂಪದ ಕ್ರಿಯಾಪದಲು- ಕನ್ನಡೊಗು ತುಲನೆ ಮಳ್ತ್ಂಡ ಬರ್ ಧಾತು ಬಾರಾ ಆಪುಂಡು. ಪೋ ಧಾತು ಪೋಗ ಇಂದ್‌ದಾಪುಂಡು. ವಿಶೇಷ ದಾನೆ ಇನ್ನಗ ಕನ್ನಡೊಡು ಬಾರಾ-ಬಾರೆಲೊ- ಬಾ ಆಂಡ. ತುಳುಟು ವಿಧಿರೂಪ ಆತ್‌ಮಟ್ಟ್‌ದ ತುಚ್ಚ ರೀತಿದವು ಅತ್ತ್. ಬಲ್ಲ ಇಂಬ್ಯಾ ಇನ್ಪಿನ ಆತೇ ತುಚ್ಛರೀತಿದವು.
ಈತೆಟ್ ತುಳುಭಾಷೆ ದ್ರಾವಿಡವರ್ಗದ ವ್ಯಾಕರಣ ನಿಯಮೊಗು ಸರಿಯಾದುಂಡು. ಅಯಿಟತ್ರ ಅವು ದ್ರಾವಿಡ ಭಾಷಾವರ್ಗದವು ಇನ್ಪಿನಯಿಕ್ ಸಂದೇಹ ಒರಿಯಾಂದ್.
ತುಳು ಪಾತೆರೊ
