9.32 ಉತ್ತಮಪುರುಷದ ಮಾಳ್ತೆ, ಮಾಳ್ಪುವೆ, ಮಾಳ್ಪೆಲೆಡ್ ಪದಾಂತೊಡು ನಾಸಿಕೊಚ್ಚಾರದ ಎಕಾರ ಇನ್ನಗ "ಎನ್" ಪ್ರತ್ಯಯದ "ನ್" ಉಚ್ಚಾರ ಮಾಜಿದ್, ಅಯಿತ ದುಂಬುದ ಎಕಾರೊಗು ಮೂಂಕ್‌ದ ಸಹಾಯೊಡು ನ ಉಚ್ಚಾರದಂಚಿನ ಸ್ವರ ಉಂತೊಡು. ಈ ನಾಸಿಕ ಉಚ್ಚಾರ ಉತ್ತಮಪುರುಷದ "ಯಾನ್" ಗ್ ಅತ್ತಾವಂದೆ ಬೇತೆ ಒಯಿಕುಳೆಗ್‌‌ಲಾ ಪತ್ತುಜಿ. ಕಾರಣ ಏನ್ ಇನ್ಪಿ ಗ್ರೀಕ್‌‌ದ ಎಗೊನ್ (egon)ದ ಲೆಕ್ಕೊ ನಾಸಿಕೊಚ್ಚಾರೊಡು ಅಂತ್ಯವಾಪಿನ ಪದ, ಸ್ವರಲಾಲಿತ್ಯದ ಕ್ರಮೊಟ್ಟು ನಾಸಿಕೊಚ್ಚಾರದ "ಏನ್"ಗ್ ಅನುಗುಣವಾದ ಮಾಳ್ತೆ(ನ್) ಆಪಿನವು ಸಹಜ. ಪಾತೆರೊಡ್ ರೂಢಿಡ್ ಅಂತ್ಯದ "ನ"ತ ಪಗತೆಗ್ "ಳ್ತೆ"ಕ್ ನಾಸಿಕ ಸ್ವರತಾಗದ್ ಅವೆನ್ ಕನ್ನಡ ಲಿಪಿಟ್ ಮಾಳ್ತೆ ಇಂದ್‌‌ದ್ ಬರೆವೊಡಾಪುಂಡು.
9.33 ನಪುಂಸಕ ಲಿಂಗ ಏಕವಚನದ ಅವು ಕ್ರಿಯಾಧಾತು "ಮಾಳ್"ನ ಸ್ವರಲಾಲಿತ್ಯದ ಪ್ರಕಾರ ಭೂತಕಾಲದ ರೂಪೊಡು ಮಾಳ್ತ್+ಅವು=ಮಾಳ್ತವು, ವರ್ತಮಾನೊಡು ಮಾಳ್ಪು+ವು=ಮಾಳ್ಪುವು, ಭವಿಷ್ಯತಕಾಲೊಡು ಮಾಳ್ಪು ಇನ್ಪಿ ಕ್ರಿಯಾಪದ ರೂಪ ಕನರ್ಪಿನ ರೀತಿನ್ ಗಮನಿಸೊಡು, ರೂಢಿಡ್ ಉಕಾರ ಲೋಪವಾದ್ ಅವು ಮಾಳ್ತ ಇನ್ಪಿ ಪ್ರಯೋಗವಿತ್ತಂಡಲಾ, ವ್ಯಾಕರಣದ ನೀತಿಡ್ ಈ ಪ್ರಯೋಗ ಸಂಕುಚಿತವಾದಿತ್ತಿನವು ಇಂದ್‌‌ದ್ ತೆರಿಯೊಡು.
9.34 ವರ್ತಮಾನದ ಚಾಲ್ತಿ(present continuous) ರೂಪೊಡು ಉಳ್ಳ ಇನ್ಪಿ ರಡ್ಡನೇ ಕ್ರಿಯಾಪದ ಸೇರುಂಡು ಇಂಗ್ಲೀಷಿದ ರೀತಿಡ್. ಉದಾ: ಯಾನ್ / ಉಳ್ಳೆ / ಮಾಳ್ತೊಂದು. (ಮಾಳ್ತ್ +ಒಂದು), I |am | doing, ಆಂಡಾ ದ್ರಾವಿಡ ರೀತಿಡ್ ವಾಕ್ಯ ಅಂತ್ಯವಾಪಿನಿ ಪೂರ್ಣರೂಪದ ಕ್ರಿಯಾಪದಟ್. ಅಂಚಾದ್ ಯಾನ್ ಮಾಳ್ತೊಂದು ಉಳ್ಳೆ, ಈ ಮಾಳ್ತೊಂದು ಉಳ್ಳ, ಆಯೆ ಮಾಳ್ತೊಂದು ಉಳ್ಳೆ ಇಂದ್‌‌ದ್ ವಾಕ್ಯಲು ಅಂತ್ಯವಾಪ, ಕೃತ- ಪ್ರತ್ಯಯೊಡು ಬದಲಾವಣೆ ಇಜ್ಜಿ.
9.35 ಪಾತೆರೊದ ಮಟ್ಟೊಡು ವರ್ತಮಾನ, ಭವಿಷ್ಯತ್ ರೂಪೊಲು ಗಲಿಬಿಲಿ ಆಪಿನ ತೋಜುಂಡು. ಉದಾಹರಣೆಗ್ ತಿರ್ತ್ ಕೊರ್ತಿನ ಪಟ್ಟಿ ತೂಲೆ.
9.36 ತಿರ್ತ್ ಕೊರ್ತಿನ ಮಾದರಿಲೆಡ್ ಇಪೆ. ಸಾಮಾನ್ಯವಾದ ವರ್ತಮಾನ ಕೃತ್ ಪ್ರತ್ಯಯವಾಂಡ, ಉವೆ ಇನ್ಪಿನವು ಧಾರಾಳವಾದ ಬೊಕ ಅಪೆ ಇನ್ಪಿನವು ಕೆಲವು ಧಾತುಲೆಗ್ ಮಾತ್ರ ತಾಗುನ ಭವಿಷತ್ಕಾಲದ ಕೃತ್ -ಪ್ರತ್ಯಯಲಾದ್‌ ತೋಜುವಾ. ಇಪೆ, ಇಪ್ಪು ಕ್ರಿಯಾರೂಪದ ಅಥವಾ ಇರ್ ಇನ್ಪಿ ಮೂಲದ್ರಾವಿಡ ಧಾತುಡ್ದ್ ಬೈದಿನ ಪ್ರತ್ಯಯ: ಅರ್ಥ that is ಇನ್ಪಿನವೆ ವರ್ತಮಾನ ಪ್ರತ್ಯಯ ಇಂದ್‌ದ್‌ಲಾ, ಉವೆ ಇನ್ಪಿನವು ಇಪ್ಪುವೆ that will be ಇಂದ್‌ ಅರ್ಥಕೊರ್ಪಾವುನ ಭವಿಷ್ಯತ್ಕಾಲ ಪ್ರತ್ಯಯ. ಅಪಗಾಂಡ, ಇಪು+ವೆ ಕೆಲವು ಧಾತುಲೆಡ್ ವರ್ತಮಾನ ಪ್ರತ್ಯಯ ಇಪೆ ಇನ್ಪಿನವು ಭವಿಷ್ಯತ್
165
ಬುಧಾನಂದ ಶಿವಳ್ಳಿ
