ಪುಟ:ವೀರರಾಣಿ ಅಬ್ಬಕ್ಕದೇವಿ.pdf/೬

ಎನ್ನ ನುಡಿ ನಮ್ಮ ದೇಶದ ಚರಿತ್ರೆಡ್ ಪರಕೀಯೆರಾಯಿನ ಪೋರ್ಚುಗೀಸೆರೆಡ ದಿಂಜ ಪೊರ್‌ಂಬುದು ಪುಗತ್ತೆ ಪಡೆಯಿನ ಸುರುತ ತಂಕದ ಪೊಂಜೊವು ನಮ್ಮ ತುಳುನಾಡ್‌ದ ಉಳ್ಳಾಲೊದ ಚೌಟವಂತೊದ ವೀರರಾಣಿ ಅಬ್ಬಕ್ಕ ದೇವಿಂದ್ ಪಣ್ಣಿನವು ನಂಕ್ ಮಾತ ಮಲ್ಲ ಅಭಿಮಾನೊದ, ಪೆರ್ಮೆದ ಸಂಗತಿ. ಚರಿತ್ರೆಡ್ ಅಬ್ಬಕ್ಕ ಪಣ್ಣಿನ ಪುದರ್‌ದ ನಾಲ್ವೆರ್‌ ರಾಣಿಲು ತೋಜಿದ್ ಬರ್ಪೆರ್, ಅಕುಳೆಡ್ ಇರ್ವೆರ್ (ಅಕುಳೆನ್ ಅಪ್ಪೆಲಾ ಮಗಳ೦ದ್ರಾ ಪರ್) ಬಾರೀ ಕೀರ್ತಿ ಪಡೆಯಿನಕುಲು. ಅಬ್ಬಕ್ಕ ರಾಣಿ ಪಣ್ಣಿನವು ಪಟ್ಟದ ಪುದರ್‌ಂದ್ ಪಣೋಡು. ಅಬ್ಬಕ್ಕದೇವಿನ ಸಾದಗೊದ ಬದೈನ್ ಕನ್ನಡೊಡುಲಾ, ತುಳುಟ್ಟಾ ನಾಟಕ ಆದ್ ಮುಡೆಯಿನ ಶ್ರೀ ಕೆ.ಬಿ ಭಂಡಾರಿ, ಸೀತಾರಾಮ್‌ ಕುಲಾಲ್, ಕುಷ್ಕಾಡಿ ವಿಶ್ವನಾಥ ರೈ, ರತ್ನಾಕರ್ ಕಾವೂರು ದುಂಬಾಯಿನಕುಳೆ ಕೃತಿಲು ರಂಗಪ್ರಯೋಗಲಾ ಆದ್ ಜನಮೆಚ್ಚಿಗೆ ಪಡೆತದ. ಪುದರ್ ಪಡೆಯಿನ ಅಬ್ಬಕ್ಕ ರಾಣಿನ ಕಾಲೊಡು ತುಳುನಾಡ್‌ಗ್ ಬತ್ತದ್ ಅಬ್ಬಕ್ಕರಾಣಿನ್ ಆಳೆ ರಾಜ್ಯದ ಸ್ಥಿತಿಗತಿಳೆನ್ ಪ್ರತ್ಯಕ್ಷ ತೂದು ಬರೆತಿನ ಇಟೆಲಿ ದೇಶದ ಪ್ರವಾಸಿ ಪಿಯಾಡೆಲ್ಲಾವೆಲ್ಲಿನ ಪ್ರವಾಸಿ ಕಥನೊದ ಆಧಾರೊಡು ಯಾನ್ ಈ ನಾಟಕ ಬರೆತೆ. ಅಂಚಾದ್‌ ಉಂದು ಪನೀತ್ ಭಿನ್ನವಾದ್ ತೊಜಿಯೆಲ್ಲ ಇಯಾರು. ನನೊಂಜಿ ರೀತಿಡ್ ಯೋಚನೆ ಮಲ್ಗೊಂಡ, ಅಬ್ಬಕ್ಕರಾಣಿ ಪನಾಳ್ ಒಂಜಿ ವಿಶಿಷ್ಟ ಪ್ರತೀಕ, ಸ್ವಾಭಿಮಾನ, ಸ್ವಾಲಂಬನೆ, ರಾಜಕೀಯ ಮುತ್ಸದ್ದಿತನ, ಸಾಹಸ, ಶೌರ್ಯ, ಸ್ವಾತಂತ್ರ್ಯ ಪ್ರೇಮ, ಪ್ರಜಾ ಪ್ರೀತಿ, ಸಾಮರಸ್ಯ ಈ ಮಾತ ಗುಣೋಕ್ತನ ಗಣಿಯಾಯಿನ ಅಬ್ಬಕ್ಕರಾಣಿನ ಆಳ್ವಿಕೆ, ವ್ಯಕ್ತಿತ್ವದ ಆಕರ್ಷಣೆನೇ ಈ ಕೃತಿ ರಚನೆಗೆ ಪ್ರೇರಣೆ. ಈ ನಾಟಕೊನು ಬೊಟ್ಟುಗು ಕೊಣರೊಂದುಪ್ಪಿನ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಅಧ್ಯಕ್ಷೆರೆಗ್‌ಲಾ, ರಿಜಿಸ್ಟ್ರಾರೆರೆಗ್ಲಾ ಬೊಕ್ಕ ಸರ್ವಸದಸ್ಯರೆಗ್‌ಲಾ ಎನ್ನ ಉಡಲ್ ದಿಂಜಿ ಸೊಲು. ಸಹೃದಯ ಓದುಗೆರೆನ ಅಭಿಪ್ರಾಯೊಳನ್ ಏಪಲಾ ಎಷ್ಟೊಂದು ಉಳ್ಳೆ ಒಲುಮೆ 15-7-2014 ಅಮೃತ ಸೋಮೇಶ್ವರ V