ಪುಟ:ಮದಿಪು ಲೇಖನೊಲು.pdf/೨೭

ತುಳು ಸಂಸ್ಕೃತಿ - ಜಾನಕಿ ಎಮ್. ಬ್ರಹ್ಮಾವರ "...ಸತ್ತಿಗೆದಾತ್ ಮಲ್ಲೆ, ಪಣವುದಾತ್ ಪೊರು, ಅರಿವಾದಾತ್ ಉರುಂಟು, ತಿರ ತುಳುನಾಡ್ ಬಾರಿ ಪೊರು ತೋಜುಂಡು..." ಉಂದು ಪಂಜುರಿ ಪಾಡ್ಡನೊಡು ಬಸ್ಸಿನ ತುಳುನಾಡ್‌ದ ಬಣ್ಣನೆ, ಕಡಲದ ಕರೆ, ಗಟ್ಟೋದ ಪುಡೆ, ಕಾಡ್‌ಗುಡ್ಡೆ, ಪಾಡಿ, ಅಡ್ಕ, ಪದವು, ಪಡು, ಬಯ್, ಕುಮರ್‌ದ ಈ ನಾಡ್ ಪೊರು ತೋಜಿಂಡಲಾ ಮುಲ್ಪದ ಬದ್ ಬಂಗದನೇ... ಏರೊಂದು, ಜತ್ತೊಂದು, ಕಂಡದ ಪುಣಿಟ್ ಜಾರಂದಿಲೆಕ ಪಜ್ಜೆ ದೀವೊಂಡು, ತುದೆ-ತೋಡು ದಾಂಟೊಡು... ಮರಿಯಾಲದ ಬಸದ ಬಿರ್ಸ್, ಮಂಚಿ- ತೆಡಿಲ್, ಗಾಳಿ-ಬೊಲ್ಲದ ಬಿರ್ದೋಲಿ, ಅರೆಗಾಲದ ಉರಿದೊಂಬು ತಡೆತೊನೊಡು. ಪ್ರಕೃತಿಡಪ್ಪ ಪೊರುಂಬುದೇ ಬೆನೊಡು. ಅಂಚಾದ್ ಮುಲ್ಪದ ತುಳುವೆರೆಡ ಬಂಗೊಗು ತರಕೊರಿನ, ತಯಿರೊಂಬಿನ ತಾಕತ್ ಬುಳೇಂಡ್. ಪ್ರಕೃತಿ ಮುನೀಂಡ ಮರಣ, ಪ್ರಕೃತಿನ್ ದಂಟ್‌ಂಡ ಕೇಡ್ ಪಣ್ಣಿನ ಅಕಲ್‌ಡ್ ಬಯಬಗಿ ಮೂಡ್ಸ್, ಅಂಸಾಣಿದ ಕುದ್ರೆಗ್ ಕಡ್ಯಾಣ ಆಂಡ್. ಪ್ರಕೃತಿದ ಸುಬಾವು ತೆರಿಯೊಂದು, ಪ್ರಕೃತಿಗ್ ಮುಟ್ಟಿ ಆದ್ ಬದುನ ವ್ಯವಸ್ಥೆ ಮಲ್ಲೊನ್ನಗದ ತುಳುವೆರ ಎಡ್ಡೆ ಆಚಾರ ಇಚಾರ, ರೀತಿರಿವಾಜಿ, ನೀತಿನೇಮ, ಜಾನಗೇನ, ನಂಬೊಳಿಗೆ, ನಡೊಳಿಗೆ, ಬಾಸೆ, ಬರವು, ಕಲೆ, ಗೊಬ್ಬು, ಧರ್ಮದಂಚಿನ ಸಂಗತಿಲ್ ಮಾತ ಸೇರ್ ತುಳು ಸಂಸ್ಕೃತಿ ಆಂಡ್, ನೀರ್, ನಿಲ, ಮರಮಟ್ಸ್, ಬುಳೆಸಲೆ, ಪಕ್ಕಿ ಮುರ ಜಂತುಲು ಮಾತನಾ ತರಕೊಂಬಿನ ಈ ಜನಪದ ಸಂಸ್ಕೃತಿ, ತುಳುವೆರ ಆರೋಗ್ಯ, ಉಲ್ಲಾಸ್, ಸುಕ ನೆಮ್ಮದಿ ಕಾತೊಂದು ಪರಂಪರೆಡ್ ಪರತ್ ಬತ್ತ್ಂಡ್, ಬುಳೇಂಡ್... ಕಾಲೊಡ್ಡ ಕಾಲೊಗು ಬೇತೆ ಬೇತೆ ಸಂಸ್ಕೃತಿದ ಸಂಪರ್ಕೊಗು ಬತ್ತ, ಪರಸ್ಪರ ಕೊರು ದೆತೊಂಬಿನ ಪ್ರಕ್ರಿಯೆಡ್ ಒಂತೆ ಸಂಕೀರ್ಣಲಾ ಆಂಡ್. 3 3 19