ತುಳು ಜಾನಪದ ಸಂಸ್ಕೃತಿಡ್ ಪುರುಬಾಲೆ 0 ಪಂಡಿಲೆಕ್ಕ ಇತ್ತೆ ಮರ್ದ್ ದೈ ಬೊಡ್ಡಿ, ಬಿತ್ತಿಲೆನ್ ತೂವರೆಗಿಜ್ಜಿ. ಅಂಗೈ ಅಗಲ ಜಾಗ್‌ಡ್ರ ಇತ್ತೆ ನೂದ್ ಇಲ್ಲಿ ಉಪ್ಪುನ, ಫ್ಲಾಟ್, ಕಟ್ಟೋಣನ್ ತೂವೊಲಿ. ಇಂಚ ಉಪ್ಪುನಗ ನನ ಗಿಡಮೂಲಿಕೆ ಬುಲೆಪುನ ಕಾಡ್, ಗುಡ್ಡೆಲೆನ್ ದುರ್ಬಿನ್ ಪಾಡ್ ತೂಂಡಲಾ ತೋಜರೆಗಿಜ್ಜಿ, ಅಂಚಾದ್, ನಮ್ಮ ಹೆರಿಯೆರ್ ನಾಡ್ ಪತ್ತಿನ ಏರ್ಲ ಬಿಲೆಕಟ್ಟರೆಗಾವಂದಿನ ಗಿಡಮೂಲಿಕೆದ ಸಂಪತ್ತೆ ಇನಿ ಮಾತಲಾ ಅಲಿದ್ ಪೋತಿನವು ಒಂಜಿ ಬೇನೆದ ಸಂಗತಿ ಆಂಡಾ, ನನೊಂಜಿ ದಿಕ್ಕಡ್ ಅಂಚಿನ ದೈ-ಬೂರ್ನು ಗುರ್ತ ಅರ್ಥ ಮಲ್ಲುನಾಯ್ಡು ಇತ್ತೆ ಏರ್ಲಾ ಉಪ್ಪಂದಿನವು ಸತ್ಯದ ಸಂಗತಿ, ಗುರ್ತ ಇತ್ತ್ಂಡಲಾ ಅವೆನ್ ನಾಥ್ ಕನತ್‌ ನುಂಗಾದ್, ಕುಟ್ಟುದು, ಕೊದಿಪಾದ್, ಪೊಡಿಮಲ್ಸ್‌ದ್ ಬಂಜಿಗ್ ದೆತೊನುನ ತಾಳ್ಮೆ ಇನಿತ ಯಾಂತ್ರಿಕ ಯುಗದಲ್ಲೆಗ್ ಇಜ್ಜಾಂದಿನವು ಭಾರಿ ವ್ಯತೆತ ಸಂಗತಿ. ಇತ್ತಿನ ಕೆಲವು ಗಿಡಮೂಲಿಕೆದ ದೈಕುಲು . . ನಾಗರಿಕತೆದ ಪ್ರಭಾವಡ್ ಪರಿಸರ ಮಾಲಿನ್ಯಡ್ ಅಲಿದ್ ಪೋವೊಂದುಂಡು, ದುಂಬುದಕ್ಲು ಸೀಕ್ ಬತ್ತಿ ಬೊಕ್ಕ ಮರ್ದ್ ಮಲ್ಪುನೆಡ್ ಸೀಕ್ ಬರಂದಿಲೆಕ್ಕ ಗಿಡಮೂಲಿಕೆನ್ ಹಾರಡ್ ಬಲಸ್‌ದ್ ಜಾಗ್ರತೆ ಮತ್ತೊಂದಿತ್ತೆರ್. . ಇತ್ತೆದಾಕ್ಲಬ್ ಐತ ಒಗರ್, ಕೈಪೆ, ಪರಿಮಲ ಒಗ್ಗುಜಿ, ಇತ್ತೆದಾಗ್ ದುಂಬುದ ಉನಸ್, ಅಡ್ಡೆ ಪುಂಡಿ ಒಗ್ಗಂದೆ ನಾಲಾ‌ದ ರುಚಿಗಾದ್ರ ವಿದೇಶದ ಅಡೈಲೆನ್ ಫಾಸ್ಟ್ ಫುಡ್ಲೆನ್, ಅತ್ತಡ ಬಾಯಿಗ್ ಪಾಡ್ಂಡ ನೀರಾಪಿನ ಬೇಕರಿದ ತಿಂಡಿಲೆನ್ ತಿಂದಿನಾಕ್ಲಗ್ ನಾರ್-ಬೇರ್, ತಪ್ಪೆ, ಕಂಡೆಲೆಡ್ ಮಲ್ಲಿನ ತಂಬುಲಿ, ಅಜಾದಿನ, ಚಟ್ಟಿ, ಸಾರ್, ಕೊದ್ದೆಲ್, ಗಸಿತ ಕೈಪುಲು, ಬೊಕ್ಕ ಗಟ್ಟಿ, ತೆಲ್ಲಾವ್ ಇಂಚಿನ ಅಡ್ಡೆಲೆನ್ ತಿನ್‌ವರಾ? ಇತ್ತೆ ಏತೋ ಜನಕೆ ಐತ ರಿಚಿ ತಿಂದ್‌ದ್ ಬೊಡ್ಡಿ, ಮಲ್ಲುನ ಬೊಡ್ಡಿ, ಪುದಾರ್‌ನ್‌ ಕೇನ್ ತೆರಿಯಂದಿನಕ್ಲು ಜಿಂಜ ಜನ ಉಲ್ಲೆರ್, ಐಡ್ಡಾತ್ರ ದುಂಬುದು ಜಿಂಜ ವರ್ಷ ವಾ ಸೀಕ್ ದಾಂತೆ ಕಲ್ಲಗುಂಡುದಲೆಕ್ಕ ಆರೋಗ್ಯಡ್ ಇತ್ತೆರ್ ಪತ್ತೆ ಇರುವ ಪೆದ್ದಿನಕ್ಲಲ ಪದಿನಾಜಿ ವರ್ಷದ ಜವಂತಿಲೆಕ್ಕ ಇತ್ತೆರ್. ಆಕುಲೆನ ಕಣ್, ಕೆಬಿಲಾ ಭಾರಿ ಸೂಕ್ಷ್ಮ ಸಮ ತಿನೊಂದಿತ್ತೆರ್, ಸಮ ಬೆನೊಂದಿತ್ತೆ, ಅತ್ತಾಂದೆ ಇತ್ತೆದಲ್ಲೆಗ್ ಒಂಜಿ ಗಲ್ಲೆಡ್ ಸೀಕ್ ಗುನ ಆವೊಡು, ಬೇನೆನ್ ತಡತೊನೆಲ್ಲ ಗೊತ್ತಿಜ್ಜಿ, ಅಂಗಡಿದ ಮರ್ದ್ ಮಾತ್ರೆಲೆಡ್ ವಂತೆ ಸಮಯೊಡು ಬೇತೆ ಸೀಕುಲು ಬರ್ಪುಂಡುಂದು ಅಕ್‌ಲೆಗ್ ಗೊತ್ತಿಪ್ಪುಜ್ಜಿ. ಗಿಡಮೂಲಿಕೆದ ಮರ್ದ್ ವಾ ಭಾದಕಲಾ ಇಜ್ಜಿಂದ್ ತುಳುಜನಪದರನ ನಂಬಲಿಕೆ.
65
