1 ತುಳು ಜಾನಪದ ಸಂಸ್ಕೃತಿಡ್ ಪುರುಬಾಲೆ - ತರೆಕ್ ಮಡೆ ದೆಪ್ಪುನ ಕ್ರಮ, ತಮ್ಮಾನದ ಗೌಜೀ, ಪೆದುಪುನ ಬೇನೆ, ಪದೆತಿ, ತೊಟ್ಲಬಾಲೆದ ತಾಂಕನದ ವಿವರನ್ - ಈ ಅಧ್ಯಯನಗೆ ಮೂಲವಾದ್ ತಲುಪುಡ್ ಕೊರೊಡಾಪುಂಡು. ಬಾಲೆನ್ ಪೆದ್ದಿ ಬೊಕ್ಕದ ಕ್ರಮಕ್ಲು, ಬಾಲೆದ ಪಿಲೆ ದೆಪ್ಪುನು, ಮೀಪಾವುನ, ತೊಟ್ಟಿಲೆಗೆ ಪಾಡ್‌ದ್ ಪುದಪನ, ಮರ್ದ್, ಹಾರ, ನಂಬಲಿಕೆ, ಮಾಂತ್ರಿಕ ನಡಾವಲಿಲು, ಗಾದೆ, ಎದುರುಕತೆ, ಗೊಬ್ಬುಲು, ಪಟ್ಟ ಪರಕೆ, ಬಾಲೆನ್ ಮಂಗಟಾವುನ, ಸಾಹಿತ್ಯ ಜೋಯಿಪದಕುಲು, ಗಾದೆದ ತಿರ್ಲ್, ಪಾಡ್ಡನಡೆ ಬರುನಂಚಿನ ಬಾಲುಲೆನ ವಿವರನೆಲೆನ್ ಎಲ್ಯ ಮಟ್‌ಡ್ ಕೊರೆ ಯಾನ್ ಮುಲ್ಪ ಪ್ರಯತ್ನ ಮಲ್ತದೆ. ತರೆಡ್ ಪರತ್ತೊಂದ್ ಬತ್ತಿನ ಕಟ್ಟಿ ಕಕ್ಲೀನ್ ಕೂಡುಕಟ್ಟೆಡ್ ಆಕುಲು ಮುಲ್ಪುನಂಚಿನ ಕರ್ಮಡ್ ಇತ್ತೆ ಐತ ನಿರೆಲ್ ಮಾತ್ರ ರೆಂಕುಂಡು, ಜಾಗತೀಕರಣದ ಮೈಮೆಡ್ ದುಂಬುದಾಕ್ಲನ ಸಂಸ್ಕೃತಿ ಮುಲ್ಲಿ ಸೇರ್ ಇತ್ತೆ ಐತ ಅರ್ಥನ್ ಅನರ್ಥ ಮಲ್ಲೊಂದು ತ್ರಿಶಂಕು ಸ್ವರ್ಗಡ್ ನಮ್ಮ ನೇಲೊಂದಿಪ್ಪುನ ಮಾತ್ರ ಸತ್ಯ. ಕೆಲಸರ್ತಿ ದುಂಬುದಾನ ಕೆಲವು ಆಚರನೆಲು ಮೂಢನಂಬಿಕೆಂದ್ ತೋಜುಂಡಲಾ, ಆ ಕಾಲಗ್ ಅವು ಸತ್ಯ. ವಾ ಪಿರಿಕಟ್ಟಲೆಗಾ ನಂಬಲಿಕೆನೇ ಮಲ್ಲ ಮರ್ದ್‌ಂದ್ ಇತ್ತೆದ ವಿಜ್ಞಾನಿಲು ಪಲೆಕ್ಕ .. ಐಟ್ ಅಕುಲೆನ ಬದ್‌ದ ತಿರ್ ದೆಂಗ್‌ಂಡ್. ಅಂಚಾದ್ ಇನಿತ ವಿಜ್ಞಾನದ ಉದಿಪನೆಗ್ ತುಳುಜನಪದರೆನ ಏತೋ ವರುಷದ ಅನುಭವ ತಿರ್ಲ್‌ಂಡ್‌ಂದು ಪಪ್ಪುನ ಪಾತೆರ ನೂದೆಕ್ ನೂದ್ಲಾ ಸತ್ಯ. ಉಡುಪಿ ಬೊಕ್ಕ ದಕ್ಷಿಣ ಕನ್ನಡ ಈ ರಡ್ಡೆ ಜಿಲ್ಲೆಲು ಭೌಗೋಳಿಕವಾದ್ ಒಂಜಿ ಪ್ರಾದೇಶಿಕ ಘಟಕ. ಮುಲ್ಪ ರಾಜ್ಯಾಡಳಿತಡ್ ಕನ್ನಡ ಭಾಸೆಯಾದ್ ಅಚರನೆಡ್ ಇತ್ತ್ಂಡಲಾ ಜನಮಾನಿನ ಸಂಪರ್ಕ ಭಾಷೆಯಾದ್ ತುಳುಭಾಸೆಗ್ ಮುಖ್ಯ ಸ್ಥಾನ ಉಂಡು. ಅಂಚಾದ್ ತುಳವೆರ ಪುರು ಬಾಲೆದ ಸಾಹಿತ್ಯಡ್ ತೆಲ್ಸ್ಡ್ ಕನ್ನಡ ಭಾಸೆದ ಬೆರಕೆ ಉಂಡುಂದ್ ಪನೊಲಿ.
12
