ಅಗತ್ಯದವು ಆದಿತ್ತ್ಂಡ್. ಐಕಾದ್ ತುಳು ಕಲ್ತೆರ್. ತುಳು ಕಲ್ಪುನಗ ತುಳು ಸಂಸ್ಕೃತಿಲೆನ್ ತೆರಿವೊಂಡೆರ್. ಅವೆನ್ ತನ್ಕುಲೆ ಪಾಸಡಿದಕುಲೆಡ ಬರೆಪಾದ್ ದೀವೊಂಡೆರ್ ಓದಿಯೆರ್. ಬತ್ತಿನಕಲೆಗ್ ಉಪಯೋಗ ಆವಡ್ ಪಂಡ್ ಪ್ರಕಟ ಮಲ್ಪೆರೆಲಾ ಸುರು ಮಲ್ತೆರ್.
Charles E. Gover ಬರೆತಿನ Folk Songs of Southern India ಪನ್ಪಿನ ಬೂಕೊಂಜಿ 1871 ಪ್ರಕಟ ಆತ್ಂಡ್. ಆ ಬೂಕುದ ಪುದರ್‌ನ್ ತೂದು ತುಳುತ್ತ ಜನಪದ ಪದಕ್ಕೊಲು ಇಜ್ಜಾಂಡ ಪಾಡ್ಡನ ನೆಟ್ಟುಪ್ಪು ಪಂಡ್ದ್ ನಾಡಿಯೆ. ಆಂಡ ಯಾನ್ ಎನ್ನಿನವು ತಪ್ಪಾದಿತ್ತ್ಂಡ್. ಕನ್ನಡ, ಬಡಗ, ಕೊಡವ, ತಮಿಳು, ಕುರಲ್, ಮಲಯಾಲಂ, ತೆಲುಗು ಈ ಮಾತ ಬಾಸೆದ ಪದೊಕ್ಕುಲು ಇತ್ತ್ಂಡ್. ಆಂಡ ತುಳು ಬಾಸೆದ ಒಂಜೇ ಒಂಜಿ ಪದ ಅಥವಾ ಒಂಜಿ ಪಾಡ್ಡನ ಆ ಬೂಕುಡು ಇತ್ತಿಜಿ.
ನೆಕ್ಕ್ ಕಾರಣಲಾ ಉಂಡು ಆ ಬೂಕುದ ಸಂಗ್ರಹೊಲು ಮುದ್ರಣ ಸಾಹಿತ್ಯ ಪ್ರಾರಂಭ ಆಯಿ ಬೊಕ್ಕದ ಪದೊಕುಲು. ತುಳು ಸಾಹಿತ್ಯ 1841ಟ್ಟ್ ಮುದ್ರಣ ಆವರೆ ಸುರು ಆದ್ 1864ಕ್ಕ್ ಜಿ. ಕೆಮರ‌ರ್ ಅಗಸ್ಟ್ ಮೆನ್ನರ್ ಬೊಕ್ಕ ಜೆ. ಅಮ್ಮನ್ನ್ ಪನ್ಪಿ ಮೂಜಿ ಬಾಸೆಲ್ ಮಿಶನರಿಳೆಡ್ದ್ ತುಳುಟ್ಟು ಕ್ರೈಸ್ತ ಪದೊಕ್ಕುಲು ಬೂಕು ಬುಡುಗಡೆ ಆತ್ಂಡ್. ಆಂಡ ಜನಪದ ಸಾಹಿತ್ಯೊಡು 1871 ಮುಟ್ಟ ಪದೊಕ್ಕುಲು ಇಜ್ಜಾಂಡ ಪಾಡ್ಡನ ರೂಪದ ಬೂಕುಲು ಮುದ್ರಣ ಅದಿತ್ತ್‌ಜಿ. ಅಂಚಾದ್ ಚಾರ್ಲ್ಸ್ ಇ. ಗೋವರ್‌ನ ಬೂಕುಡು ತುಳು ಜನಪದ ಪದ ಸೇರ್ಪಡೆ ಆತ್‌ಜಿ ಪಂಡ್ದ್ ಪನೊಲಿ.
ತುಳು ಪಾಡ್ಡನ ಇಜ್ಜಾಂಡ ಜನಪದ ಸಾಹಿತ್ಯೊಡು ತುಳುಟ್ಟು ಪ್ರಕಟ ಆಯಿನ ಸುರುತ್ತ ಬೂಕೇ ಅವು ಅಗಸ್ಟ್ ಮೆನ್ನರ್ 1886ಟ್ಸ್ ಪ್ರಕಟ ಮಲ್ತಿನ 'ಪಾಡ್ಡನೊಲು' ಪನ್ಪಿನ ಬೂಕು. ರಡ್ಡನೆದವು ಇಂಗ್ಲಿಷ್‌ಡ್ ತುಳು ಜನಪದ ಇಜ್ಜಾಂಡ ಭೂತಾರಾಧನೆ ವಿಭಾಗೊಡು ಪ್ರಕಟ ಆತಿನ ಬೂಕು ಅವು ಎ.ಸಿ. ಬರ್ನೆಲ್‌ನ. The Devil Worship of Tuluvas. ಈ ಬೂಕು 1894 ಡ್ದ್ 1897 ಮುಟ್ಟ ಇಂಡಿಯನ್ ಎಂಟಿಕ್ವೆರಿ ಪನ್ಪಿ ಒಂಜಿ ಇಂಗ್ಲಿಷ್ ಪತ್ರಿಕೆಡ್ ಪ್ರಕಟ ಅತಿನ ಲೇಖನೊಲೆ ಸಂಗ್ರಹ ಆದುಂಡು. ಈ ಬೂಕುನು 2008 ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಪ್ರಕಟ ಮಲ್ತ್‌ಂಡ್.
ತುಳುನಾಡ್‌ದ್ ಭೂತಾರಾಧನೆ ವಿಭಾಗೊಡು ಸುರುಟ್ಟು ಪ್ರಕಟ ಆಯಿ 'ಪಾಡ್ಡನೊಲು' ಪನ್ಪಿ ಬೂಕುನು ಸಂಗ್ರಹ ಮಲ್ತ್‌ದ್ ಬೊಲ್ಪುಗು ಕನೈದಿನಾ‌ರ್ ಬಾಸೆಲ್ ಮಿಶನ್ ಸಂಸ್ಥೆದ ಒರಿ ವಿದೇಶಿ ಮಿಶನರಿ ಆಗಸ್ಟ್ ಮೆನ್ನರ್ (1828-1891).
