ಸುರೂತ ಪಾತೆರ
 |
 |
|
ನರಮಾನಿನ ಬದ್ಕ್‌ಡ್ ಅಪ್ಪೆನೇ ಮಾತೆಕ್ಲ ಮೂಲ. ಬಾಲೆನ್ ಪೆದ್ದ್‌ದ್, ತಾಂಕ್‌ದ್ ಮೋಕೆಡ್ ಮಲ್ಲೆ ಮಲ್ತಿನವೆ ಎಲ್ಲೆದ ಮಲ್ಲಾತಿಗೆಗ್ ಮೂಲವಾಯಿಲೆಕ್ಕ, ಆಯಾ ಬಾಸೆದ ಸಾಹಿತ್ಯೋ ಅಪ್ಪೆ ಪಂಡಿನ ಅತ್ತ್ಂಡ ರಚನೆ ಮಲ್ತಿನ ಸಾಹಿತ್ಯ-ಆಯ್ಟ್‌ಲ ಜೋಕುಲೆ ಪದರಂಗಿತನೆ ತಾಯಿಬೇರ್. ತೂಲೆ, ನಮ ಮಾತ ಅಪ್ಪೆನ ಜೋಗುಳ ಕೇಂಡ್‌ದೆ ನೆದ್ರೆೊಂದಿತ್ತತ್ತೆ? ಅಪ್ಪೆನ ಕೊಂಗಾಟ, ಬಗೆಬಗೆತ ಆಟ ಮಾಟೊಲು, ರಾಗರಂಜನೆಲು ನಮ್ಮೊಲಯಿ ಸಂಸ್ಕಾರವಾದ್, ನಮಕ್ (ನಂಕ್) ಸಂಗೀತ-ಸಾಹಿತ್ಯೊದ ಎಡ್ಡೆ ಅಭಿರುಚಿನ್ ಬೊಲೆಪಾದ್‌ಂಡತ್ತೆ? ಅಪ್ಪೆ ತಿನ್ಪಾಯಿನ ಮಿರೆ ಪೇರ್-ಬಡವುದ ಮಣ್ಣಿ ಉಡಲ್‌ಗಾಂಡ, ಅಪ್ಪೆನ ಜೋಗುಳ ರಾಗಮಾಲೆಲು ಮಾತ, ಮನಸ್ಸ್‌ಗ್ ಕುಶಿ ಕೊರ‍್ದು ಎಡ್ಡೆ ಅಭಿರುಚಿನ್ ಬೊಲೆಪಾದ್‌ಂಡತ್ತೆ? ಆಯಿನೆಡ್ದಾವರ ಅಪ್ಪೆನ ಜೋಗುಳ-ರಾಗಮಾಲೆ ಕತೆಎದುರುಕತೆ, ಅಜ್ಜಿಕತೆ ಬೊಕ್ಕ ಬೇತೆಮಾತ ಇಸಯ ಸೇ‍ರ್ದ್ ಜೋಕ್ಲೆ ಜಾನಪದ ಆಂಡ್. ಈ ಜೋಕ್ಲೆ ಜಾನಪದನೆ ಸಂಗೀತ ಸಾಹಿತ್ಯ ನೃತ್ಯ ಇತ್ಯಾದಿ ಕಲೆಕ್ಲೆನ ಮೂಲ ಉಜಪತ್ತ್ (ಒಸರ್) ಅಂಚೆನೆ ಉಸಿರ್ ಆದುಂಡು.
ಮಾತ ಬಾಸೆಲೆ ಲೆಕ್ಕ ನಮ್ಮ ತುಳು ಬಾಸೆಡ್ಲ ಜೋಕ್ಲೆ ಪದರಂಗಿತನೆ ಮಾತ ಸಾಹಿತ್ಯೊಗು ಸಹಜ ಮೂಲಾದಿತ್ತ್ಂಡ್. ತುಳು ಬಾಸೆ ದ್ರಾವಿಡ ಬಾಸೆಲೆಡ್ ದಕ್ಷಿಣದ್ರಾವಿಡ ಬಾಸೆದ ಸಾಲ್‌ಗ್ ಸೇರುಂಡು. ಪ್ರಾಚೀನ ಕನ್ನಡ, ತಮಿಳ್ ಬೊಕ್ಕ ಮಲೆಯಾಳಂ ಬಾಸೆಲೆಗ್ ಮುಟ್ಟ ಉಂಡು, ಆ ಬಾಸೆಲೆಡ್ದ್ ಒಂಜಿ ಕಾಲಗಟ್ಟೊಡು (ಸುಮಾರ್‌ ಕ್ರಿ.ಪೂ.ದ ಅಕೇರಿ ಬೊಕ್ಕ ಕ್ರಿ.ಶ.ದ ಆದಿಡ್) ತುಳು ಬಾಸೆ ಪ್ರತ್ಯೇಕಾದ್ ತುಳುನಾಡ್ (ತೆಂಕಾಯಿ ಚಂದ್ರಗಿರಿ ನದಿ, ಬಡಕಾಯಿ ಕಲ್ಯಾಣಪುರ ತುದೆ/ಸೀತಾ ನದಿತ ನಡುಟಿತ್ತಿ) ಪ್ರದೇಶೊಡು ಸ್ವತಂತ್ರ ಆದ್ ಬುಲೆಂಡ್. ಈ ತುಳುನಾಡ್‌ಡ್ ನೆಲೆಯಾಯಿನ ನರಮಾನಿಲು ಪಾತೆರೊಂದಿತ್ತಿನ ದ್ರಾವಿಡ ಬಾಸೆನೆ ತುಳು ಬಾಸೆ. ಅಪಗ ಒರಿದಿನ ದ್ರಾವಿಡ ಬಾಸೆಲೆಡ್ ಸಮೃದ್ಧ ಆದಿತ್ತಿನ ಜನಪದ ಸಾಹಿತ್ಯ ಈ ತುಳು ಬಾಸೆಡ್ಲ ಸಮೃದ್ಧ ಆದ್ ಬುಲೆವೊಂದು ಬತ್ತ್ಂಡ್. ಆಂಡ ಕನ್ನಡ ಮಲೆಯಾಳೊದ ಜನಪದ ಸಾಹಿತ್ಯೊಡ್ದ್ ಭಿನ್ನವಾಯಿನ ಸಂದಿ, ಪಾಡ್ದನ, ಕಬಿತೆ, ಅಜ್ಜಿಕತೆ, ಎದುರುಕತೆ, ನುಡಿಗಟ್ಟ್, ಜೋಕ್ಲೆನ ರಾಗಮಾಲೆ, ಗೊಬ್ಬುಲು ಇತ್ಯಾದಿ ನಾನಾ ಪ್ರಕಾರೊಡು ಸಮೃದ್ಧವಾದ್ ಬೊಲೆವೊಂದು ಬತ್ತ್ಂಡ್.
ತುಳುನಾಡ್‌ದ ಈ ದ್ರಾವಿಡ ಬಾಸೆಗ್ ಒಂಜಿ ಕಾಲಗಟ್ಟೊಡು (ಸುಮಾರ್‌ಕ್ರಿ.ಶ. ೮ಡ್ದ್ ೧೪ನೇ ಶತಮಾನ) ಲಿಪಿಲಾ ಇತ್ತಂಡ್. ಅವೌ ಮಲೆಯಾಳಂ ಲಿಪಿಕ್ ಮುಟ್ಟ ಉಂಡು. ಆ ಲಿಪಿನ್ ತುಳು ಮಲೆಯಾಳಮ್ ಲಿಪಿ, ಅಂಚೆನೆ ತಿಗಳಾರಿ ಲಿಪಿಂದ್ ಲೆತ್ತೊಂದಿತ್ತೆರ್. ಮಲೆಯಾಳ ದೇಶೊಡ್ಲ್ ಇಂಚೆನೆ ಲೆತ್ತೊಂದಿತ್ತಿನೆಡ್ದಾವರ ಆ ಲಿಪಿ ತುಳು ದೇಶೊಡ್ದು ಮಲೆಯಾಳಮ್ ದೇಶೊಗು ಪೋತಿನಾಂದ್ ಪಣೊಲಿ. ತುಳುನಾಡ್‌ದ ಸಾಮಂತ ರಾಜೆರ್ ತುಳುಬಾಸೆ ಬೊಕ್ಕ ಲಿಪಿಕ್ ಆಶ್ರಯ ಕೊರೊಂದಿತ್ತೆರ್. ಆಯಿನೆಡ್ದಾವರ ತುಳುಲಿಪಿಟ್ ಬರೆತಿನ ಶಾಸನ ಮಸ್ತ್ ತಿಕ್ದ್ಂಡ್. ಅಂಚನೆ ತುಳು ಮಹಾಕಾವ್ಯೊಲೆನ್ ತುಳು ಲಿಪಿಟ್ ಬರೆತಿನ ಓಲೆಗ್ರಂಥೊಲು ತಿಕ್ದ್ಂಡ್. ಇಂಚ ಇತಿಹಾಸೊಡು ಮಾನ್ಯತೆ ಪಡೆತಿನ ತುಳು ಲಿಪಿನ್ ಇತೆ ಪುನರುಜ್ಜೀವನ ಮಲ್ತೊಂದಿಪ್ಪುನ ಪ್ರಯತ್ನ ಸಾರ್ಥಕವಾಯಿನ. ತುಳು ಜೋಕುಲೆ ಸಾಹಿತ್ಯೊಡು ಜೋಕುಲೆ ಜನಪದ ಸಾಹಿತ್ಯೆನೆ ಪಿರಾಕ್‌ದ (ಸುರೂತ). ಅವೌ ಬಾಯಿಡ್ದ್ ಬಾಯಿಗ್ ಬತ್ತಿನವು. ಇಂಚಿತ್ತಿ ಜೋಕುಲೆ ಪದೊಕ್ಲೆಡ್ ಬಾಲೆ ತೂಂಕುನ ಪದ, ಬಾಲೆ ಮಾನಾವುನ-ಮಂಗಟಾವುನ ಪದ, ಬಾಲೆನ್ ಗೊಬ್ಬಾವುನ
ಜೋಕುಲೆ ಉಜ್ಜಾಲ್ -iii
