ಸಂಪೊಲಿಗೆದ ಪಾತೆರ ತುಳುಟ್ಟು ಒಂಜಿ ಪಾತೆರ ಉಂಡು. ತಾರೆ ಕಂಗ್‌ದ ಕುಬಲ್ ಕರೆಂಚಿಂಡ ಮುದೆಲ್ ತೂಲ ಪಂಡ್‌ದ್. ಅಂಚನೆ ಒಂಜಿ ಭಾಷೆ ಸಂಸ್ಕೃತಿ ನಾಶ ಅವರೇ ಐತಾ ಬೇರ್‌ದ ಒರುಟ್ಟು ಇಪ್ಪುನ ಜೋಕುಲೆಗ್ ಭಾಷೆ ಸಂಸ್ಕೃತಿ ಸರಿಯಾದ್ ತಿಕ್ಕೊಂದು ಇಜ್ಜಿಂದ್ ಅರ್ಥ. ಈ ಗ್ಲೋಬಲೈಷನ್ ಕಾಲೊಡು ತಾಂತ್ರಿಕವಾದ್, ಆರ್ಥಿಕವಾದ್ ದುಂಬು ಉಪ್ಪುನ ಭಾಷೆದ ಒಟ್ಟುಗೆ ಪ್ರಾದೇಶಿಕ ಕಿನ್ಯ ಭಾಷೆಲು ಸರಿಸಮವಾದ್ ಪಜ್ಜೆ ದೀವರ ಆಯಿಜಿಂಡ ಕ್ರಮೇಣ ಆ ಕಿನ್ಯ ಭಾಷೆಲು ಅಳಿಯೊಂದು, ಅಶುದ್ದ ಆವೊಂದು ಪೋಪುಂಡು. ಐಕ್ ಉದಾಹರಣೆಯಾದ್ ನಮ್ಮ ತುಳು ಭಾಷೆ ಪ್ರಬಲವಾಯಿನ ಇಂಗ್ಲಿಷ್-ಕನ್ನಡದ ಒಟ್ಟುಗು ಸರಿಸಮ ಆದ್ ನಡಪರೆ ಆವಂದೆ ಆ ಭಾಷೆಲೆನ ಪ್ರಭಾವರ್ದಾವರ ಮೆಲಾನೆ ತುಳು ಭಾಷೆದ ಮೂಲೋಗು ಪೆಟ್ಟ್ ಬೂರೊಂದುಂಡು. ಭಾಷೆದ ಬೇರ್‌ದ ರೂಪೊಡು ಇಪ್ಪುನ ಜೋಕುಲೆಗ್ ಬೇತೆ ಭಾಸೆದಲೆಕ ಜೋಕುಲೆ ಸಾಹಿತ್ಯ ತಿಕ್ಕೊಂದು ಇಜ್ಜಿ. ಇತ್ತೆದ ಈ ಅಂತರ್ಜಾಲ ಯುಗೊಟ್ಟು ಟಿವಿ ಮೊಬೈಲ್ ಮಾಧ್ಯಮೊಡು ಅಪ್ಪೆ ಭಾಸೆಡ್ ತುಳುತ್ತ ಜೋಕುಲೆ ಸಾಹಿತ್ಯ ತಿಕ್ಕೊಂದು ಇಜ್ಜಿ ಯಾ ಇಜ್ಜಿಂದೇ ಪನೋಲಿ. ಅಪ್ಪೆ ಪನ್ಪುನ, ಜೋಕುಲೆನ್ ಮಾನಾವ್‌ನ ಪದೊತ್ತ ಬದಲ್ಗ್ ಮೊಬೈಲ್‌ಡ್ ಇಂಗ್ಲಿಷ್ ರೈಮ್ಸ್ ತಿಕ್ಕೊಂದುಂಡು, ಬೇತೆ ಭಾಷೆದ ಕಾರ್ಟೂನ್ ಸುಲಬೊಡು ತಿಕ್ಕೊಂದುಂಡು. ಇಂಚ ಅಪ್ಪೆ ಭಾಸೆ ಮೂಲೊಡು ಗಟ್ಟಿ ಆಪುನ ಸಮಯೋಡು ವಿಲಾಯಿತಿ ಬಾಸೆ ಗಟ್ಟಿ ಆವೊಂದುಂಡು. ಉಂದು ನಮ್ಮ ತುಳು ಬಾಸೆ ಅಳಿಯರೆ ಸ್ಪಷ್ಟ ಕಾರಣೊಡು ಒಂಜಿ. ನೆಕ್ಕ್ ಪರಿಹಾರ ಆವೋಡು ಪಂಡ ಇಂಗ್ಲಿಷ್ ಕನ್ನಡ ಬಾಸೆಡ್ ಇತ್ತಿಲೆಕನೇ ತುಳು ಬಾಸೇಡ್ಲಾ ಜೋಕುಲೆ ಸಾಹಿತ್ಯ ಉಂಡು ಮಲ್ಪೊಡು. ಇಂಚ ಉಂಡು ಮಲ್ತಿನ ಸಾಹಿತ್ಯೊಲು ಸುಲಭವಾದ್ ತುಳು ಜೋಕುಲೆಗ್ ತಿಕ್ಕೊಡು. ಇಂಚಿನ ಒಂಜಿ ಭಾಸೆದ ಬುಲೆಚ್ಚಿಲ್ದ ಬಗೆಟ್ ದೂರ ಆಲೋಚನೆ ದೀವೊಂದು ಅರ್ಥವತ್ತಯಿನ ಈ ಬೇಲೆ ಮಲ್ಲ ಬೇಲೆ, ಒರಿ ರಡ್ಡ್ ಜನೋರ್ದು ಆಪುನ ಬೇಲೆ ಅತ್ತ್. ಈ ಬೇಲೆಗ್ ತುಳುವೆರ್ ಒಟ್ಟು ಸೇರೋಡು, ತುಳುವೆರೆನ್ ಒಟ್ಟು ಸೇರಾವೋಡು. ಅಂಚಾದ್ ಈ ಬೇಲೆನ್ ಒಂಜಿ ಸಂಗೊದಕುಳು ಅರ್ಥ ಮಲ್ತೊಂದು ಸಂಗೋದ ಮುಖಾಂತರ, ಮಲ್ಪುನ ಬೇಲೆಡ್ ಮುಕ್ಯವಾದ ದೆತೊಂದು, ನಿರಂತರವಾದ್ ನಡಪಾಬುನ ಅಗತ್ಯ ಆದುಂಡು. ಅಂಚ ಈ ಪ್ರಸ್ತಾವನೆನ್ ರಾಜಧಾನಿಡ್ ಸುಮಾರ್ ವರ್ಸೋದಿಂಚ ತುಳುಕ್ಕಾದ ಬೆನೊಂದಿಪ್ಪುನ ಸಂಘ ತುಳುವೆರೆ ಚಾವಡಿ ಬೆಂಗಳೂರುದ ಅಧ್ಯಕ್ಷೆರೆಡ, ಸದಸ್ಯೆರೆನ ದುಂಬು ದೀನಗ, ಐತ ಅಗತ್ಯೊನು ಅರ್ಥ ಮಲ್ತೊಂದು ಪ್ರೀತಿಡ್ ಕೈಜೋಡಿಸವರೆ ಒತ್ತೊಂಡೆರ್. ಈ ಒಂಜಿ ಯೋಜನೆದ ಕಾರ್ಯವ್ಯಾಪ್ತಿ ಮಸ್ತ್ ಮಲ್ಲೆ ಆಯಿನೆರ್ದಾವರ ನೆನ್ನ್ ಸಾಧಿಸಾದ್ ತೂಜಾವೊಡು ಪಂಡ ಮಸ್ತ್ ರೀತಿಡ್ ಬೇಲೆ ಮಲ್ಪುನ, ಆಲೋಚನೆ ಮಲ್ಪುನ, ಬುಕ್ಕ ಬೇಲೆ ಮಲ್ತಿನಕುಲೆನ ಅನುಭವ ಬೋಡಾಪುಂಡು. ದುಂಬಾದ್ ತುಳುಕ್ಕಾದ್ ಸಾಹಿತ್ಯಸಾಮಾಜಿಕ ಕ್ಷೇತ್ರೊಡು ಪೊರುಂಬಾಟ ಮಲ್ತೊಂದಿಪ್ಪುನ ಹಿರಿಯಕ್ಲೆನ, ಅನುಭವಸ್ಥೆರೆನ ಸಲಹೆ, ಅಭಿಪ್ರಾಯೊನ್ ದೆತೊಂಡ. ಉದಯ ಧರ್ಮಸ್ಥಳ, ಡಾ. ಸಾಯಿಗೀತ, ಕನರಾಡಿ ವಾದಿರಾಜ ಭಟ್, ಮಹೇಂದ್ರನಾಥ ಸಾಲೆತ್ತೂರು, ವಸಂತ ಶೆಟ್ಟಿ ಬೆಳ್ಳಾರೆ ಇಂಚಿನ ವಿದ್ವಾಂಸೆರೆನ ಸಲಹೆ ಅಭಿಪ್ರಾಯೊನ್ ದೆತೊಂಡ. ಈ ಯೋಜನೆ ತುಳುಕ್ಕು ಒಂಜಿ ಸುರುತ್ತ ಆಯಿನೆರ್ದಾವರ ನೆತ್ತ ಬಗ್ಗೆ ಜನೋಕುಲೆಗ್ ಗೇನ ಪುಟ್ಟಾವುನೆರ್ದ್ ಸುರುಮಲ್ದ್ ಅನಿಮೇಷನ್ ವೀಡಿಯೊ ಮುಟ್ಟ ಕೊನೊಪುನ ಅಂಗಲಾಪುಡು ಕಾರ್ಯಯೋಜನೆಲು ಮೂಡುದು ಬತ್ತ್ಂಡ್. ಸುರುಕ್ಕಾದ್ ಜೋಕುಲೆ ಸಾಹಿತ್ಯೊದ ಬಗ್ಗೆ ಪಿರಿಯ ಕವಿಕುಲು, x
ಜೋಕುಲೆ ಉಜ್ಜಾಲ್
