ಪುಟ:ಅಬ್ಬಗೆ – ದಾರಗೆ.pdf/೧೭

ಅಯ್ಯೋ ಸ್ವಾಮೀ ಈರ್‌ಾ ಅಂಚ ಪನಡೆ, ತಂಗಡಿನ ನೀರ ಪರ್ಬೊಗು ಪೋಯಿಜಿಡ ಯಾನ್ ತಪ್ಪುಗಾರ್ತಿ ಆಪೆ. ಉಪ್ಪುನಾಲ್ ಎಂಕೊರ್ತ ತಂಗಡಿ. ಎನ್ನಜೆರ್ ಗಿಂಡಿನ್ ಕನತ್ತ್ ತಾಂಕ್‌ನಗನೇ ಪರ್‌- "ಮಗಾ! ಸೊನ್ನೆ! ನಿಕುಲು ಸೊನ್ನೆ ಗಿಂಡಿ ಪಲಿ ತಂಗಡಿ ಲೆಕ ಉಪೊಡು ಮಗಾ. ಒಪ್ಪ ತನ್ನೊಡು ಒಂಜಿ ಬಂಜಿಡ್ ಬತ್ತಿ ಜೋಕುಲೆಲೆಕ್ಕ ಕೂಡೊಂದು ಸೇರೊಂದು ಉಪೊಡು ಪನ್ಸರ್, ಯಾನ್ ಇರೆನ ಕೈ ಪತ್ತಿ ಬೊಕ್ಕ ಅಚ್ಚೆರೆಗ್ ಗಿಂಡಿನ್ ಆ ಬೆಮ್ಮೆರೇ ದಾನ ಕೋರಿಲೆಕ್ಕ ಕೊರೆರ್. ಅಂಚಾದ್ ಯಾನ್ ನೀರ ಪರ್ಬೊಗು ಪೊಜಿಡ ಸರಿ ಆವಂದ್, ಸೊನ್ನೆ ಛಲ ಪತಿಯಲ್. ಸೊನ್ನೆನ ಮನಸ್‌ ಆಸೆ, ಅಲೆನ ಹಟ ಉಂದೆನ್ ತೂಯಿನ ಗುರುಮಾರ್ಲೆ ಆವು ಪೋದು ಬಲ್ಲೆ. ಯಾನ್ ಅಡ್ಡಿ ಮಲ್ಪಯ. ಆಂಡ ಒಂಜಿ ಪಾತೆರ ಪನ್ನೆ. "ಕಾನ ಬೊಟ್ಟುಗು ಪೋಯಿನ ಈ ಮಾನೊಗು ಕೋರೆ ಮಲ್ಲೊಂದು ಇಡೆಗ್ ಪಿರ ಬರಿಯರೆ ತೀರಂದ್, ಬತ್ತಡ ನಿನನ್ ಪಿದಯಿದ ಗೌಡಿ ಚಾಕರಿ ಮಲ್ಪಾವೆ. ಕಿದೆ ಕೊಟ್ಯದ ಕಂಜಿ ಕೈಕಂಜಿಲೆಗ್ ಅರ್ಕಂಜಿ ಮೈಪಾವೆ. ಬೈಪಾಡವೆ. ಉಂದೆನ್ ನೆನಪು ದೀಲ" ಪಂಡಿನ ಗುರುಮಾರ್ಲೆ, ಬೈರಾಸ್‌ನ್ ಒಮ್ ಪುಗೆಲ್‌ಗ್ ಪಾಡೊಂದು ಪಿದಯಿ ಪೋಯೆ. ಕಂಡನೆನ ಕಟ್ಟಿ ನಿಟ್ಟಿದ ಪಾತೆರ ಕೇಂಡಲಾ ಸೊನ್ನೆ ದಾನೆ ಆಯರೆ ಉಂಡಾ? ಅವು ಆದ್ ತೀರಡ್ ಪನ್ಸಿ ತೀರ್ಮಾನೊಡು ಉರ್ಕಿದೊಟ್ಟು ಜಲ್. ನಿರೆತ್ತಲೆನ್ ಲೆತ್ತೊಂಡಲ್ ಬೆರಿ ಪಾಸಡಿ ಮಲ್ಲೊಂದು ಕಾನ ಬೊಟ್ಟುದ ತಾದಿ ಪತಿಯಲ್. ಪೊಗ್ಗೆಯಲ್. ಕಾನ ಬೊಟ್ಟುದ ಇಲ್ಲ ಮುಂದಿಲ್‌ಗ್ ಬತ್ತಲ್, ಉಲಯಿ ಮುಖ ಮಂಟಪೊಗು ಅವುಲು ಸೇರಿನ ಪೊಣ್ಣು ಪೊಂಜೊವು ಮಾತ ಸೊನ್ನೆಗೆ ಕಣ್ ಕಣ್ ತೂಯೆರ್. ಸೊನ್ನೆ ಉಲಯಿ ಪಡಸಾಲೆಗ್ ಬತ್ತಲ್, ಬಾಕಿಲ್ ಒಂದಾದ್ ಉಲಯಿ ಇಲ್ಡ್ ಸೇರೊಂಡಲ್. ಈತಾನಗ ಅಲ್ಪ ಅಟಿಲ್ ಅರೆಗಾನ ಮಲ್ಲೊಂದಿತ್ತಿನ ಜನಮಾನಿ ಕೆಲಸದ ಕೈ ಬುಡಿಯೆರ್. ಕಾಯಿ ಕಜಿಪು ಮೂರೊಂದಿತ್ತಿನಕುಲು ಮುಟದನೆ ಬುಡಿಯೆರ್. ತಾರಾಯಿ ಪಿರೊವೊಂದಿತ್ತಿ ಪೊಂಜೊವು ಪೆರದನೆ ಬುಡಿಯರ್, 16